筆者一直都好認同期權世界隱含住好多資訊，因為期權有唔同嘅行使價、唔同到期月份、又有分Call同Put，從炒家喺邊一個時間，做邊一個月份，邊一個行使價，做Call定Put，已經可以留意倒唔少端倪。可惜，坊間分析期權實在太過片面，成日都集中留意個倉位變化，例如見倒27000call同27200call未平倉各加1000張，配合個市升，就話應該有大戶做左1000套Bull call spread (Debit call spread)，跟住就大肆宣揚個市會向好，因為有人做左好多套牛跨。
可惜，大學金融學嘅期權第一課嘅同學仔都會知，一個未平倉增加係同時有一個買家同一個賣家組成，所以如果假設27000同27200各加1000張係只係兩個人嘅交易，即係有人做1000套牛跨同時有人做1000套熊跨，試問一個人睇升一個人睇跌，點解證明個市會升呢？
下一步，推敲者會話，因為個市向好，無理由會係大升市開個熊跨嘅，咁已經犯左錯誤，因為涉及主觀嘅判斷。升市開牛跨定熊跨跟本就係取決於你係做緊跟勢定係迴歸策略。可能又有啲人話，無理由喺咁價外嘅位置做熊跨嘅，收倒嘅權金又唔多。其實，就係因為觀點同操作手法不同，期權市場每日先會有咁多成交，如果存在某個位嘅期權無可能做Long/Short，價格就會即刻郁去合理嘅位置，令市場平衡。
另外，絕對唔可以排除期權炒家有可能只係用期權黎做對沖，曾經有一個ibank朋友分享過，見倒有客戶不斷喺700做Short call，由200蚊做到上400蚊，唔少人都恥笑緊個客戶。點知，後來先發現條友喺股票acct原來Long左極多700，股數遠超期權合約數目。
所以，筆者成日強調睇期權引伸波幅好過睇倉位，就係咁解。